اشعار اسماعيل حسن

ميرى واو
ياسلام
لو شفتو ميرى..... ياسلام
لونها ..... زى زيتونة
ناضجة.. راقدة فوق غصن السلام
العيون الشاربة
من الجور
توشوش ليك ... كلام
القوام بس شن نقول
ما خلاص ... كمل الكلام
ميرى ... زى الريح تولول
وميرى زى فرخ الحمام
كنا ننضم...
و يا حلاوة اللهجة
ميرى... كان تمتم ... فى الكلام
وبى بشيش حدثت ميرى
قلت ,,, ميرى..
انشاءالله ... موتو انا
وبى حنين ... قالتلى .. هاو
قلت ... هاو والله هاو
ما زمان فرقنا هاو
ادفنونى ان شاء الله حى فى ربوع الجنة واو


البنات والتلفون

البنات والتلفون
واحدة تمت للقراية
وظفوها
والغريبة الحظ رماها
ضمن باشكاتبن قديم
جنه جن صنف الحريم
وابتدأ التلفون يرن
كل دقيقة
وكل ثانية
وبالطبع دايرين فلانة
وهى تنضم
مرة تهمس
مرة تضحك
مرة بتوسوس وخايفة
من نضم زولنا القديم
قام سألها
يا فلانة...
البضربولك منن ؟
قالت..أخوانى الكبار
خدلو ضحكة
وتانى ضحكة
اصلو أمك يا خرابة
يعنى كان ولداها تيم ؟؟؟
ياسلام

القمر بوبا اسماعيل حسن



الصغيرة شجيرة الأراك
ياقمر عشرة الفي سماك
شاغلة روحي وقلبي المعاك
وين لقيتك لامن آباك
القمر بوبا عليك تقيل

العيون الما بدمعن
نامن أو صاحيات يبرقن
لا بصيدن لا بعشقن
سرهن في الجوف يحرقن
كشفن رموشن أو غمضن
كلو موت ماتقول برحمن
القمر بوبا عليك تقيل

الصغيرون الما كبير
الرقيبة قزازة عصير
السنون براقن يشين
العيون متل الفناجين
مابتحش قشة تناقير
مابتشيل جردل على الزير
الزراب فوقا تقول حرير
شتتي شبار يامضمير
خلي قلوب الصبيان تطير
انتي ريحتك دمور فرير
ولا بت السودان اصيل
القمر بوبا عليك تقيل

الجزير ام بحرا حما
فيك روحي وحبي النما
مابسيبا ان بقا في السما
ما بخلي الناس تظلما
روحي في دربك سالمة
يا غرق يا جيت حازمة
القمر بوبا عليك تقيل

القديما قديما الحمام
الويزين في موجو عام
يا مرايقة قليلة كلام
وا حلاتا تقول السلام
القمر بوبا عليك تقيل

الغزال الفوق في السلم
المحبة تزيد الألم
كل يوم اصبح لي في هم
سيسبان عودك منظم
شمعدان نفسك يامختم
البرتكان نهدك مدردم
القمر بوبا عليك تقيل

الصغيرون ام الجنا
ياكريم ربي تسلما
تبعد الشر من حلتا
جنة للأم الولدتا
الفي جبل عرفات وضعتا
تسلم البطن الجابتا
في ترباية حبوبتا
التميرة الفي سبيطتا
الصفار صابغ خضرتا
معزورة امها كان دستا
وا هلاكي النار شافتا
معزباني انا ود حلتا
القمر بوبا عليك تقيل

الدفيفيق الدابو ني
البسيمتو بتكويني كي
اهلو ضنو عليها وعلي
حبها النساني والدي
ما بخليك ان بقيت حي
يا قصيبة السكر الني
نهدك الما رضع جني
ووب على امك ووبين علي
القمر بوبا عليك تقيل

الديوان الديمة مقشوش
بالزهور والورد معروش
بالحرير الأصلي مفروش
ريحتو مايقوما بلا رتوش
كان دا وصفو ماهو مغشوش
قدروا الساكنينو في الحوش
القمر بوبا عليك تقيل

بحر الدمير العبا ونزل
مرة يسقي الفل والنخل
فيهو عام وزينا وقدل
ياهنينة البيك عقلي انشغل
بعت روحي عشان ليك اصل
وانت ابعد لي من زحل
يا قمر بوبا عليك تقيل

المبارك شيخ الضهر
العليك ساسكت وفتر
قلي جنيت ولا دستر
واي أنا المرضان مكنتر
جابو لي حكيم خير وشر
قالي يا زول مرضك كتر
سببك كم شلاخا خضر
القمر بوبا عليك تقيل
*************

قصيدة يا نور العين

قلبي الحابيك ما خان لياليك ما ناسي الماضي ماتقول ناسيك ما بدل حبو ابدا ماتنكر ليك لكن الأشواك والنار حواليك يانور العين يانور العين انت وينك وين في اللون الأسمر ذوبت شبابي وعشقت الجنة وفي الجنة عذابي صابر وبتألم والمر دا شرابي ياحليل الراحو ياحليل احبابي يا نور العين يا نور العين انت وينك وين الشعر الناعم بي عطرو اسرني والوجه الناير بي نورو غمرني عيونو النعسانة برموش تجرحني خلتني متيم وين راحت مني يا نور العين يا نور العين انت وينك وين انا والأنغام والعود في ايدي بحكيلو حكايتي ويعيد ترديدي واشكيلو همسة أو عذب نشيدي ياما الأوتار تفضحني من ريدي يا نور العين يا نور العين انت وينك وين

[ندعوك للتسجيل في المنتدى أو التعريف بنفسك لمعاينة هذه الصورة]

اعمل حسابك يابيكو البنات ديل بودرن قبيله مش انت وحدك غلف مشاعرك واقتل قلبك وقفل اذنيك بي شمع والبس نظارات معتمة وبعد ده الله يحلك منهم

عبد الرحيم كتب:

اعمل حسابك يابيكو البنات ديل بودرن قبيله مش انت وحدك غلف مشاعرك واقتل قلبك وقفل اذنيك بي شمع والبس نظارات معتمة وبعد ده الله يحلك منهم

شكرا علي المرور يا عبد الرحيم

وصدقت بنات الزمن دا ماليهم امان وربك يستر منهم

لكن قليف المشاعر كمان صعب

هيثم عبدالسيد ابوماجد كتب:

زيد كمان وكمان وياريت تحكى قصة كل قصيده

ان شاء الله قريب نزلها يا ابو ماجد

ابوالوليد كتب:

المبارك شيخ الضهر
العليك ساسكت وفتر
قلي جنيت ولا دستر
واي أنا المرضان مكنتر
جابو لي حكيم خير وشر
قالي يا زول مرضك كتر
الخ/بيكو الله يشفي الجميع قول آمين

امين يا رب وشكرا علي مرورك