بسم الله الرحمن الرحيم
وياريت تبقي راجل وتكمّل القراية
من الملاحظ إنو الناس ما قاعده تناقش المواضيع البتخص البلد
سواء كانت البلد الكبيرة أو البلد الصغيرة يعني السياسة لا الكلام عن تردي الوضع لا
نقول البلد في الخريف غرقت قلتو لا تعليق نقول المحاباة والوساطة سايطة الدنيا
تقولو لا تعليق
لمن واحد يكتب موضوع منقول من مصادر متاحة والموضوع بتكلم عن الوزير الفلاني قصر
في الشئ الفلاني وعمل وعمل ودي حقيايق ويذكر إنو المقال دا ناس الجريدة أبو ينشروهو
يجي الزول البناقشك يخلي الموضوع الاساسي عن التقصير في الخدمات والبنيات ويقعد يقوليك المقال
دا ما منع من النشر لانو في حرية صحافة ويحاجك ويلاجك بدون مايتكلم ولا كلمة عن رايو في الموضوع زاتو شنو
طيب فرضنا إنو نشر وفي حرية صحافة إنت رايك في الكلام الاتقال شنو!!؟
نحن ياساده بنجري ونتزاحم علي هوامش الاشياء وبنهرب من المضمون
ولما تكتب موضوع بيسرد غياب المسؤلين وقطوعات الكهربا والموية وغلاء السكّر
وتراكم العطالة والبطالة والفساد بدل نتناقش ونشوف المشكلة وين وأي زول يقول رايو
معارض والله مؤيد ماكل زول عندو وجهة نظر
لكين نحن والحمد لله نخلي دا كووووووولّو ونقعد نسأل
الموضوع دا إنت الكتبتو والّا ناقلو؟
إتكتب متين؟والكان حاضر منو؟
لكن الموضوع الاساسي ما مهم عارفين لية؟
عشان نحن أسوأ من البيزنطيين الماعارفين الجدادة من البيضة والله البيضة من الجدادة
ولما تكتب وتتكلم عن التعليم الحكومي بقي تجارة والعلاج بقي إستثمار ورطل السكّر بي ألف وربع
ونفق عفراء غرق في شبر مويه والموقف الجديد القعوي(الضفاضع) فيهو نصّة نهار
يجيك واحد يقوليك نحن ما عندنا منتدي سياسي عليكم الله دا يقولو فيهو شنو؟؟
نحن ياشباب المنتدي مقصرين ومقصرين ومقصرين
في نفسنا وفي أهلنا وفي قريتنا
أهلنا الما عرفو المنتديات والانترنت وحقوقهم ضايعة
س: المسيكتاب قدمت كم شهيد؟
المسيكتاب فيها كم مسؤوول؟
المسيكتاب صوّتت للناس ديل كم مرّة
المسيكتاب قدمت كم وكم وكم
شوفو الجنيناهو
-المدارس بنيناها برانا
-المستشفي بنيناهو برانا
الموية وعملناها برانا
أولادنا وقاعدين عطالة
والشغالين وشغالين ليهم ناس حجر شنو وبير شنو وتميد منو
ونحن والحمد لله دار زي دار ناس بير البّاشا ماعندنا
أبقو رجال وناقشو بي موضوعية وشفو مشاكل المسيكتاب
ومشاكل السودان كلها